₱1.5M ecstasy package nasamsam

Nasa isa’t kalahating milyong piso na halaga ng mga ecstasy ang nasabat ng mga tauhan ng Philippine Drug Enforcement Agency (PDEA) at Ninoy Aquino International Airport (NAIA)-Inter Agency Drug Interduction Group sa may Central Mail Exchange Office sa Pasay City kahapon ng umaga.

Ayon kay PDEA-NCR Director Ismael Fajardo, noong Abril 5 ng taong kasalukuyan, dumating ang package sa Philpost na galing sa Netherlands.

Nang dumaan ito sa x-ray screening, dito na natuklasan na naglalaman ito ng organic subs­tance kaya agad itong ininspeksyon ng PDEA at K-9 dog.

Nadiskubre na nag­lalaman ito ng ipinagbabawal na gamot.

Agad namang naki­pag-ugnayan ang pamunuan ng cargo company sa consignee ng package.

Kahapon ng alas-11:00 ng umaga nang maaresto ng pinagsanib na puwersa ng PDEA at NAIA si Monica Santos, 20-anyos, ng Barangay Obrero, Quezon City sa may Domestic Road ng nasabing lungsod makaraang i-claim nito ang nasabing bagahe.

Natuklasan na ipina­dala ang nasabing package ng isang nangnga­ngalang Samson Santos mula sa Netherlands.

Inihahanda ang pagsasampa ng kaukulang kaso laban sa nadakip na suspek.