Sa isang pribado at hindi kalakihang kompanya sa Masangkay Street, Sta Cruz, Manila namasukan bilang secretarya si Florinda at kahit hindi naman kalakihan ang kanyang suweldo, sapat naman para sa kanyang sarili at tulong sa kanyang pamilya.
Minabuti ni Florinda na sa malapit at pribadong kompanya sa Maynila siya magtrabaho sa halip na humanap ng malaking kompanya sa lungsod na Makati dahil nais niyang makauwi kaagad kapag natapos na ang oras ng kanyang trabaho upang makatulong sa magulang at kapatid sa pag-aalaga sa kanilang bunsong kapatid.
Sa kabila ng kawalan ng interes na magkaroon ng sariling pamilya lalu na’t abala na rin sa pagta-trabaho at pagtulong sa mga magulang at kapatid, hindi rin naiwasan ni Florinda na mapansin ang magandang pakikitungo sa kanya ng nakatalagang security guard ng kompanyang pinaglilingkuran.
Dahil walang karanasan sa tawag ng pag-ibig, noong una’y hindi pinapansin ni Florinda ang kakaibang atensiyong ipinagkakaloob sa kanya ng kanilang security guard na si Abel Pecayo lalu na’t mas bata ng pitong taon sa kanya ang lalaki.
Pakiramdam ni Florinda, nakatatandang kapatid o ate lamang ang turing sa kanya ni Abel, bukod sa nakikita niya rin sa lalaki ang ugali ng kanyang nakababatang kapatid noong hindi pa nadidisgrasya sa Saudi Arabia.
Gayunman, nang simulan ni Abel na magprisinta na ihatid siya sa kanilang bahay sa halip na matulog lalo na’t alam niyang puyat ang lalaki sa magdamag na pagbabantay sa kompanya, nakaramdam siya ng kakaibang ligaya dahil sa importansiyang ipinakikita sa kanya ng itinuturing niyang kaibigan.
Una’y naiilang pa si Florinda sa paghahatid at minsa’y pagsundo sa kanya ni Abel subalit kalaunan ay nakagaanan na niya ng loob ang lalaki lalu na’t nakikita naman niya rito ang katapatan at walang halong pagsasamantala nito.
Tulad ni Florinda, wala ring pananagutan sa buhay si Abel at dahil naging malapit na sila sa isa’t-isa, hindi na nailang na magtapat ng kanyang pag-ibig ang lalaki na hindi na rin naman ikinagulat ng babae lalu na’t nararamdaman na niya ang kakaiba at espesyal na pagtingin nito sa kanya.