2-3 taon pang tiis sa trapik

Dalawa hanggang tatlong taon pa ang titiisin ng mga motorista para maresolba ang nararanasang matinding problema sa trapiko sa Metro Manila.

Ito ang pag-amin ni Department of Public Works and Highways (DPWH) Secretary Mark Villar sa kanyang talumpati sa Financial Times-First Metro Investment Corp. Summit, kung saan ang mahinang imprastraktura, aniya, ang isa sa kinakaharap na sitwasyon ng ekonomiya ng bansa gaya ng problema sa daloy ng trapiko.

“It is a problem we can solve in two to three years,” ani Villar.
Bunsod nito ay nagha­hanap na umano ng iba pang mga proyekto ang pamahalaan na magpapaluwag sa trapiko sa National Capital Region (NCR).

Ito rin, aniya, ang dahilan kung kaya’t itataas­ ng administrasyong Du­terte ang government spending ng hanggang sa 7 porsiyento ng Gross Domestic Product (GDP).

Malapit na rin aniyang matapos ang ilan pang malalaking proyekto tulad ng NLEX-SLEX connector projects at Harbor Link projects at NAI­A ­Expressway at Skyway Extension project na mala­ki ang maitutulong upang mabawasan ang matin­ding trapik sa araw-araw.

Ang NLEX-SLEX Connector Road ay sasakop sa konstruksyon at ope­rasyon ng 8-kilometer 4-lane elevated expressway sa Philippine National­ Railway (PNR) right of way.

Magsisimula ito sa C3 Road sa Caloocan na babagtas sa Maynila sa España patungo sa Polytechnic University of the Philippines (PUP), Sta. Mesa na uugnay sa Metro Manila Skyway Stage 3 (MMSS3).

Habang ang Harbor Link Project ay sasakop sa 8.07-km extension ng NLEX mula sa Minda­nao Avenue, Quezon City hanggang sa C-3 sa Caloocan City.