2 GUN-FOR-HIRE GUTAY SA SWAT

Humandusay sa kamatayan ang ­dalawang lalaking ito na hinihinalang mga miyembro ng sindikatong gun-for-hire nang manlaban sa mga awtoridad sa Lungsod ng Caloocan. (Cherk Balagtas)

Dalawang kalalakihan na hinihinalang miyembro ng gun-for-hire syndicate ang halos magutay ang katawan sa mga tama ng bala ma­tapos na manlaban sa mga tauhan ng Special Reaction Unit-Special Weapon and Tactics (SRU-SWAT) kahapon ng madaling-araw sa Lungsod ng Caloocan.

Sa ulat ng Caloocan City Police-Station Investigation Division (SID) partikular ni PC/Insp. Illustre Mendoza, ganap umanong alas-12:30 ng hatinggabi nang maganap ang insidente sa kahabaan ng C-3 Road, Barangay 28 ng nasabing lungsod.

Bago ang insidente ay nakatanggap umano ng tawag ang himpilan ng pulisya mula sa mga resi­dente ng nasabing lugar hinggil sa dalawang hindi pa nakikilalang suspek na lulan ng iisang motorsiklo na armado pareho ng baril at isinalarawan na pawang nasa 35 hanggang 40-an­yos, kung saan ang nagmamaneho ng motorsiklo ay may taas na 5’5 habang ang angkas ay nasa 5’7, parehong katamtaman ang pangangatawan at nakasuot ng mga jacket.

Nagpapaikot-ikot umano ang dalawa nang pabalik-balik sa kaha­baan ng nasabing lugar na tila may inaabangan at halatang mga armado ng baril na nakabukol sa kanilang mga beywang.

Agad namang rumes­ponde ang mga tauhan ng SRU-SWAT at nagtungo­ sa lugar, ngunit nang makita sila ng mga suspek ay agad silang pinaulanan ng bala ng mga ito. Nagkaroon din ng ilang minutong habu­lan bago na-corner ang dalawa na mabilis na nagbabaan sa motorsiklo at nagtakbuhan sa ma­damong bahagi ng lugar.

Hindi naman sila tinantanan ng mga awtoridad, ngunit sa halip na huminto sa kakatakbo ay pinaputukan pang muli ng paulit-ulit ng mga suspek ang mga alagad ng batas, dahilan upang mapilitan na rin silang ratratin ng mga ito.

Na-recover ng mga tauhan ng Scene on the Crime Operatives (SOCO) ang dalawang pirasong .45 cali­ber na baril at mga larawan ng tatlong katao na hinihinala ng mga awtoridad na target patayin ng mga ito. Nakunan din ng dala­wang sachet ng hinihinalang shabu ang mga suspek.