Nasawi ang tatlo katao sa isinagawang drug buy-bust operation ng Manila Police District (MPD) sa lungsod ng Maynila kamakalawa.
Sa imbestigasyon ni SPO2 Joseph Kabigting ng Manila Police District-Homicide Section, kabilang sa mga nasawi ang mga biktimang sina Arnel at Arnold Pangilinan, nasa hustong edad, residente ng No. 639 Felina Ext. Sampaloc, Maynila; at Fernando Taleon, alyas ‘Enan’, 46, taga 278-A Sta. Teresita St. Sampaloc, Maynila.
Nabatid na pinagbabato umano ng mga biktima ang mga pulis na humuli sa pusher na si Ariel Dulay sa isang buy-bust operation kung saan walo pang kalalakihan ang nakasamang inaresto dakong alas-4:15 ng hapon sa nabanggit na tirahan ng magkapatid na Pangilinan.
Nagpanggap umanong poseur buyer si SPO1 Marian Esmas at pagkaabot ng dalawang tig-P500 kay Dulay ay dinakma ito kasama ang walo pang kalalakihan.
Magsasagawa na umano ng imbentaryo ang mga pulis na umaresto nang paulanan ng bato ng tatlong biktima na nanggaling sa ikalawang palapag ng bahay at paputukan ang mga pulis kaya gumanti.