Sugatan ang tatlong katao nang tamaan ng bato sa ulo na ipinukol ng sinasabing isang lasenggo habang nagla­lakad sa Trece Martires City, Cavite.

Ginagamot ngayon sa Gen. Emilio Aguinaldo Hospital ang mga sugatang sina Leoncio Moling, 64-anyos; Noel Biñas, 46, at Marjun Barbarona, 18, pawang taga-Cavite.

Arestado naman ang suspek na nakila­lang si Roger Espartiro, 21-­anyos, binata, stay-in sa isang construction site sa Brgy. Hugo, Trece Martires City.

Sa ulat ni SPO1 ­Richard Chavez, ng Trece Martires City Police Station, alas-8:30 kamaka­lawa ng umaga nang naganap ang insidente sa loob ng Golden Horizon Subd., Brgy. Hugo, Trece Martires City, Cavite.

Nabatid na nagla­lakad lamang sina ­Moling at Biñas habang sakay naman ng motorsiklo si Barbarona sa loob ng nasabing subdibisyon nang walang ­sabi-sabing pagbabatuhin sila ni ­Espartiro na umano’y ­la­ngo sa alak.

Nabatid na sa ulo tinamaan sina Mo­ling at Biñas at sa katawan ­naman si Barbaro­na kaya kinailangang ­isugod sila sa ospital.

Kasong frustrated murder at malicious mischief ang isinampang kaso laban sa suspek. (Gene Adsuara)