Bumulagta ang dalawang lalaki, habang isa ang arestado sa inilatag na buy-bust operation ng mga tauhan ng Manila Police District, kahapon ng hapon sa Binondo, Maynila.
Kinilala ni SPO2 Joseph Kabigting, imbestigador ng Manila Police District – homicide section ang mga suspek na nasawi na sina Abner Nasi, alyas Abeng, 41, barangay tanod ng 417 Juan De Moriones St. Binondo. Hindi pa nakikilala ang isa pa na inilarawan nasa pagitan ng edad na 40-45, at isa umanong Muslim.
Habang naaresto naman ang isang Janneth Ramos , 27 , live-in partner ni Nasi at residente rin sa nasabing lugar.
Naganap umano ang insidente dakong alas-dos ng hapon nang ilatag ang isang buy-bust operation sa pangunguna ni P/Chief Insp. Leandro Gutierrez, hepe ng Station Anti-Illegal Drugs – Special Operation Task Unit ng MPD-Binondo Police Station 11 sa bahay ni Nasi sa Juan De Moriones sa Binondo.
Tinangka umano ng dalawang napatay na manlaban sa mga awtoridad, kaya nang gumanti ang mga alagad ng batas ay kapwa tumimbuwang ang dalawa sa loob mismo ng bahay, habang binitbit naman si Ramos.
Narekober sa crime scene ang dalawang kalibre .38 na baril, shabu na aabot sa halagang P4,000; marked money at mga shabu paraphernalias.