Hindi huhulihin ang mga motoristang dadaan sa apat na pangunahing lansangan ng Parañaque City patungong Ninoy Aquino International Airport (NAIA) sa oras na ipatupad ang number coding scheme sa lungsod sa darating na Sabado (Oktubre 1).
Nilinaw kahapon ni Mar Jimenez, hepe ng Public Information Office (PIO) ng Parañaque City na hindi sisitahin o titiketan ang mga pribadong motorista na dadaan sa Macapagal Avenue, Roxas Boulevard, Airport Road at MIA Road, pawang mga daan patungong paliparan na nasa hurisdiksiyon ng lungsod.
Ipinauubaya ng pamahalaang lokal sa traffic enforcers ng Metropolitan Manila Development Authority (MMDA) ang panghuhuli sa mga lalabag sa number coding paglagpas sa mga nasabing lansangan.
Ipapatupad din ang window hour sa number coding scheme ng lungsod simula alas-nuwebe ng umaga hanggang alas-kuwatro ng hapon para sa pribadong sasakyan.
Samantalang wala aniyang ibibigay na exemption sa mga truck kapag ipinatupad ang number coding scheme kung saan bawal dumaan ang mga ito mula alas-sais ng umaga hanggang alas-nuwebe ng umaga at alas-kuwatro ng hapon hanggang alas-siyete ng gabi.