7 DEADLY LOCALS SA FIVB WCWC

Oct 18, 2016 (Oct 17, 2016) D M

Narito ang kukumpleto sa 7 deadly locals na isasabak ng PSL-F2 Logistics Manila sa FIVB World Club Women’s Championship na sisiklab ngayon sa MOA Arena.

Ces Molina

Hindi man kasing sikat ng ibang manlalaro ay kayang makipagsabayan ni Petron spiker Ces Molina sa husay at galing.

Ang dating San Beda top hitter na mula Cabanatuan, Nueva Ecija ay tahimik pero ang kanyang trabaho ang nagsusumigaw kung gaano siya kagaling.

Bahagi siya ng 13-0 sweep ng Petron sa PSL All-Filipino noong 2014 at malaki ang papel sa pagkuha nila ng korona sa sumunod na Grand Prix conference.

Sapat na rin ang international exposure niya dahil kasali siya sa 2015 Asian Women’s Club Championship sa Vietnam at itong taon ay napasama sa Thai-Benmark League sa Bangkok, Thailand.

Mika Reyes

Ang middle blocker ng F2 Logistics na si Mika Reyes ang huling pinangalanan para kumpletuhin ang pitong manlalaro na sasamahan ng pito pang imports sa FIVB WCWC.

Umani ng papuri at pagbatikos ang dating La Salle star matapos maisama sa PSL All-Stars.

Pero tila sanay na si Reyes sa mga masasakit na salita, kanyang ipinagpapasalamat ang mga mabubuting bagay na sinasabi sa kanya.

Mula Pulilan, Bulacan si Reyes at ang kanyang dedikasyon sa sport ang nagdala sa kanya sa world stage.

“Inaamin ko hindi naman ako ang star noong high school, siyempre dahil sa passion mo sa sport at sa dedication mo sa ginagawa mo ‘yun ang magfu-fuel sayo na husayan at ‘wag sumuko,” saad niya.

Sa unang dalawang taon niya sa La Salle ay agad siyang nakakuha ng back-to-back championships bago natalo ng dalawang sunod sa Ateneo pero hindi nasayang ang kanyang paghihirap dahil umalis siya sa UAAP nang may bitbit na korona.

7 DEADLY LOCALS SA FIVB WCWC

Oct 17, 2016 (Oct 16, 2016) D M

Heto ang tatlo pang locals na tinapik para isagupa sa FIVB World Club Women’s Championship.

Kim Fajardo

Hanga kay F2 Logistics setter Kim Fajardo ang ilang international coaches kabilang sina Thai Chamnan Dokmai at Korean Kim Keung Un.

‘Smart player’ daw siya ayon kay Dokmai, at ‘fast learner’ ani Kim.

Tubong Calatagan, Batangas si Fajardo at dinala ng beteranong coach na si Francis Vicente at assistant Kungfu Reyes sa UST at nanalo ng tatlong championship sa UAAP girls’ volley bago ni-recruit ni Ramil de Jesus sa La Salle at nagwagi ng dalawang kampeonato.

“Masaya ako kasi pangarap ko ito ang makatungtong sa world stage, hindi naman lahat nabibigyan ng ganitong pagkakataon kaya gagalingan ko talaga,” pahayag ni Fajardo.

Jen Reyes

Si defense specialist Jen Reues ng Petron, dati raw ay hindi natanggap sa varsity team ng Marilao Central School sa Bulacan.

Araw-araw siyang pumupunta sa tryouts para magbaka-sakali sa lineup pero apat na beses siyang napagsarhan.

Hindi siya sumuko, sa huli ay napili siyang wing spiker.

Tinalo ng team ni never-say-die Jen na Central Luzon Regional Athletic Association ang powerhouse NCR nina Alyssa Valdez, Fille Cainglet at Melissa Gohing.

Jaja Santiago

Natuto ang produkto ng broken family na si Foton middle blocker Jaja Santiago na maglaro ng volleyball nang dalhin siya ng kanyang ate na si Dindin sa UST.

Noong 2013 ay dumating ang malaking oportunidad kay Jaja ang maglaro sa University of California-Los Angeles sa Amerika.

Pero tinanggihan niya.

Masayang-masaya ang lolo at lola ni Jaja na sina Victorio Antonio, Jr. at Luz Antonio ng Tanza, Cavite sa tagumpay ng kanilang apo na kanilang tinuring na anak nang iwan sa kanila ng magulang. (Tatapusin)

7 DEADLY LOCALS SA FIVB WCWC

Oct 16, 2016 (Oct 15, 2016) C C

Bago umarangkada ang PSL-F2 Logistics Manila sa FIVB World Club Women’s Championship sa Oct. 18-23 sa MOA Arena, kilalanin muna ang pitong manlalarong Filipinas na lalahok sa torneo.

Kasama ng PSL-F2 Logistics Manila ang Pomi Casalmaggiore ng Italy, South American powerhouse Rexona Ades ng Brazil at Eczacibasi VitrA Istanbul ng Turkey sa Pool A.

Sa Pool B ang Asian powerhouse teams Bangkok Glass ng Thailand at Hisamitsu Springs ng Japan, VakifBank Istanbul ng Turkey at Volero Zurich.

Jovelyn Gonzaga

Ang probinsiyana mula Jordan, Guimaras ang isa sa unang inanunsyo na kabilang sa Magnificent Seven. Ang kwento niya ay hindi kasing-sarap gaya ng kanyang tagumpay ngayon.

Laki sa mahirap na pamilya ay natuto si RC Cola Army opposite spiker Jovelyn Gonzaga na magsikap sa sariling paraan.

Naglaro siya sa varsity team ng Central Philippines University. Labag man sa kalooban ng namayapang ina ay araw-araw tinatawid niya ang dagat mula sa isla ng Guimaras papunta ng Iloilo.

Nasama siya sa national team sa 26th Southeast Asian Games, kasunod ay inalok ng Army sa elite team nito.

Sa nakaraang 28th SEA Games sa Singapore, siya ang itinalagang team captain at nitong July ay binigyan siya ng golden ticket para sa FIVB World Club Women’s Championship.

“Para po ito sa family ko, para sa mother ko,” masaya pero umiiyak na pahayag ng kaliweteng spiker. “Pangarap naming dalawa ‘to, kahit nasa heaven na siya kinontinue ko pa rin ang promise ko sa ‘yo.”

Rachel Anne Daquis

Sabay ni Gonzaga na nakatanggap ng golden ticket ang maganda at kikay na si Rachel Anne Daquis.

Naluha rin ang dating FEU star dahil sa mga taong hindi naniniwala sa kanyang pagkakapili para sa FIVB WCWC.

Ibang bersyon ni Daquis ang nakita ng mga reporters noong July 2.

Pero nanindigan ang tubong Taytay, Rizal na abutin ang kanyang pangarap.

“Alam ko namang hindi ako ang pinakamagaling, pero pinagsisikapan ko kung ano man ang nararating ko at hindi ako titigil para maabot ko ang mga pangarap ko,” sabi niya.

Pareho sila ni Gonzaga na parte ng apat na kampeonato ng Army sa PSL at nagsama rin sa 28th SEA Games. (Itutuloy bukas)