CONGRATS sa Regal Films at kay Ai Ai de las Alas dahil binigyan ng CEB ng Grade B ang pelikulang Our Mighty Yaya.
Masaya si Ai Ai pagkatapos niyang mapanood ang pelikula sa premiere night nito kamakalawa sa SM Megamall.
“Feel good siya eh, pampamilya,” bulalas ng Kapuso Comedy Queen.
Marami ang nag-agree na bagay sana kung isinabmit ito sa MMFF nu’ng nakaraang taon.
Pero bagay rin ito na pang-Mother’s Day.
Proud si Ai Ai sa pelikulang ito, at sinasabi niyang mapili na siya sa projects.
Hindi na siya ‘yung basta tanggap na lang nang tanggap.
“Dati pa naman na talagang pinipili ko na ‘yung mga projects na gagawin ko, hindi lang ‘yung basta tira lang nang tira.
“Kailangan, may proper timing. Saka si Boy (Abunda) naman ang nagdedesisyon sa mga tatanggapin ko,” pakli nito.
At least, proud siya sa mga nagawa niyang pelikula dahil nakadalawang best actress na siya sa international film festivals para sa Area.
Nagpapasalamat din si Ai Ai sa ABS-CBN 2 dahil nakapag-promote siya sa Tonight with Boy Abunda.
Nagpasalamat din siya sa GMA 7 dahil pinayagan siyang mag-promote sa Kapamilya network.
Hindi raw ibig sabihing babalik na siya sa Kapamilya pagkatapos ng kontrata niya sa Kapuso network.
“Wala pa naman, eh. Hindi pa napapag-usapan ‘yun, matagal pa naman,” safe na sagot ni Ai Ai nang tinanong namin kung balik-Kapamilya na ba siya.
Aminado siyang nami-miss na niya ang ABS-CBN 2 lalo na ang mahabang hallway na dinadaanan niya kung saan nakapaskel doon ang mga litrato ng mga Kapamilya artists.