Bago ang elites, mga tsikiting muna ang papagitna sa pag-arangkada ng Alaska IronKids Triathlon ngayong Sabado, Aug. 5, sa Shangri-La Mactan Resort and Spa sa Cebu City.
Pangungunahan ng magkapatid na Tara at Francheska Borlain ang mahigit 360 kabataang edad 6-14 na tutugon sa starting gun ng event na hinati sa apat na divisions at ginawang palabok bago ang Cobra energy Drink Ironman 70.3 Championship sa Linggo.
Dinomina ng Borlain kids ang kani-kanilang age divisions sa mga naunang Alaska IronKids race series.
Focus sina Tara at astigin sa boys side na si Wacky Baniqued na inaasahang haharurot muli sa 13-14 category ng junior version ng Ironman na tatampukan ng swimming, biking at running events.
Ang iba pang events dito ay ang 6-8, 9-10, 11-12 at 13-14 categories. May 24 teams na binubuo ng 72 participants ang magbubuno sa relay competitions.
Susuportahan nina triathlon reigning champion Tim Reed at Regent 5150 titlist Dimity-Lee Duke ang mga participants sa Alaska IronKids ng event na inorganisa ng Sunrise Events, Inc at suportado ng Cobra Energy Drink.