Ibabandera ng Philippine women’s volleyball team sina three-time UAAP MVP Alyssa Valdez at skipper Mika Reyes sa 29th Southeast Asian Games sa Kuala Lumpur, Malaysia.
Pinangalanan ng Larong Volleyball sa Pilipinas, Inc. kahapon sina Valdez at Reyes kasama ang 10 players mula sa national pool na hahataw ng bola sa biennial meet sa August 19-31.
Makakasama nila sina Denden Lazaro, Rhea Dimculangan, Kim Fajardo, Gen Casugod, Aby Marano, Maika Ortiz, Jovelyn Gonzaga, Aiza Maizo-Pontillas, Jaja Santiago at Ces Molina.
Sina Rachel Anne Daquis at Dawn Macandili ang reserves ni head coach Francis Vicente.
Puntirya ng national squad na lampasan ang fifth-place finish sa nakaraang edition sa Singapore noong 2015.
Sa men’s, makakasama ni team captain Johnvic de Guzman sina Ranran Abdilla, Geuel Asia, Bryan Bagunas, Relan Taneo, Reyson Fuentes, Bonjomar Castel, Alden Cabaron, Herschel Ramos, Jack Kalingking at Greg Dolor. Reserves sina John Carascal at Petr Quiel.
Lalahok muna ang national squad sa AVC Asian Seniors Women’s Championship dito sa Manila (August 9-17) bago tumungo sa Malaysia.