Niratrat ng riding-in-tandem ang isang negosyante sa loob ng kanyang sasakyan kamakalawa ng gabi sa Marikina City.

Dead-on-the-spot sanhi ng tinamong mga tama ng bala sa ulo at katawan ang biktimang si Godofredo Espiritu, 47, may-ari ng isang tinda­han ng sapatos at residente ng St. Benedict Subdivision, Barangay Nangka ng nabatid na lungsod.

Hindi naman ginalaw ng mga suspek ang asawa at 3-anyos na anak ng biktima na kasama nito sa kotse at nakaupo sa likuran.

Sa ulat ng Marikina PNP, naganap ang insidente pasado alas-nuwebe ng gabi sa harapan ng bahay ng pamilya Espiritu.

Kakadating umano ng pamilya sa bahay at kakaparada ng sasak­yan ng biktima nang lapitan ito ng riding-in-tandem na nakamotorsiklo at pagbabarilin ang padre de pamilya na naging sanhi ng agaran nitong kamatayan.

Mabilis naman ang ginawang pagtakas ng mga suspek nang masi­gurong wala ng buhay ang kanilang target.

Sa ngayon ay inaalam pa ng pulisya ang mo­tibo ng pamamaslang at ang pagkakakilanlan ng mga suspek.