Matapos tanggihan ng ABS-CBN ang kahilingan na baguhin ang script ng “Ang Probinsyano” dahil sa umano’y “unfair portrayal” sa kapulisan, binawi ng Philippine National Police (PNP) ang lahat ng tulong na ibinibigay ng kanilang hanay sa hit teleseryeng pinagbibidahan ni Coco Martin.
Nabatid na sa memorandum na inilabas nitong Biyernes, sinabihan ni Police Community Relations Director Eduardo Garado ang lahat ng tanggapan ng PNP at mga personnel na itigil na ang pagbibigay ng resources sa production team ng teleserye.
“All units, offices, and personnel are advised to immediately refrain from assisting, to withdraw their support to the production of the said teleserye in terms of PNP resources like patrol cars, firearms, personnel, venues, and other items and gadgets being used in the teleserye,” ayon sa memorandum.
Binanggit ni Garado na nangako ang mga producer sa dayalogo noong Oktubre 17 at 23 na reremedyuhan ang mga isyu pero tila hindi naman ito naisakatuparan dahil sa nagpatuloy ang pagiging kontrabid ng PNP sa palabas.
Nauna nang nagbabala ang Department of the Interior and Local Government (DILG) na posible silang maghain ng kaso laban sa mga producer kung itutuloy nila ang hindi patas na pagsasalarawan sa kapulisan.
Nanindigan na si ABS-CBN Corporate Communications head Kane Errol Choa na kathang-isip lamang ang mga karakter, lugar at mga kaganapan sa teleserye at wala umano itong intensyon na siraan ang reputasyon ng anumang organisasyon o indibiduwal.
Kinondena na ng grupong Concerned Artists of the Philippines (CAP) ang pakikialam umano ng PNP at DILG sa teleserye dahil maituturing na itong pag-atake sa “freedom of expression” ng industriya.
“They should stick to cleaning up their own ranks of real-life destabilizers, human rights violators and other shady suspects characters if they really want to project an image of credibility to the Filipino people,” ayon sa kanilang statement.