Itinaas na sa posisyon bilang Election Officer IV sa Commission on Election (Comelec) ang isang dating janitor pero nakapasa sa Bar examination.

Nabatid na inaprubahan na ni Comelec Chairman Andres Bautista ang rekomendasyon ng Regional Selection Promotional Boards na nagpu-promote kay dating Comelec janitor at ngayon ay Attorney Ramil Comendador, bilang Election Officer IV noong Hulyo 17.

“In our previous conversations, I encouraged Atty. Comendador to consider applying for a higher position,” ayon kay Bautista. “We recognize his diligence and determination to reach his goals and we are pleased to see him accept the challenge. We look forward to working with him even more now as he takes on his new role as an Election Officer.”

Una nang nag-viral sa social media ang istorya ni Comendador na matapos na magtrabaho bilang janitor ng Comelec noong 2007, ay nagsumikap na mag-aral at nakatapos ng Bachelor in Public Administration degree noong 2011 sa Unibersidad de Manila at ng Juris Doctor noong 2016.