Balik-angas Cabagnot pumutok sa unang laro

Balik ang angas ng San Miguel Beer nang kubabawan ang Blackwater Elite 93-79 sa pangalawang laro sa MOA Arena Miyerkoles ng gabi.

Kinalsuhan ng Beermen ang dalawang sunod na talo tungo sa 3-3 even card sa PBA Philippine Cup elims. Nabaon sa 1-4 ang Elite.

Nakabalik na si Alex Cabagnot pero wala pa rin si Christian Standhardinger sa Beer. Hindi pa pinaglaro ang Fil-German para maipa­hinga ang tuhod at mga binti.

Sa first 12 minutes ay 7 of 23 mula sa field ang Beermen, 2 for 9 sa 3-point range. Sa kabila ay 9 of 26 shooting ang Elite sa opening period at 0 for 8 sa long range pero abante ng manipis na 21-19.

Nagising ang Beer sa second period, kumonekta ng tatlong tres si Chris Ross at naagaw ang manibela 44-41 sa halftime.

Nang dumistansiya ang SMB 91-74 ay inubos na ni coach Leo Austria ang kanyang bench.

Ipinagdiinan ni June Mar Fajardo ang pagi­ging reigning five-time MVP sa nilistang 20 points, 21 rebounds, 5 assists at 4 blocks para sa San Miguel. Tumapos ang naka-protective mask na si Cabagnot ng 19 points, may 17 si Terrence Romeo, at 14 kay Ross na 4 for 5 sa 3-pointers.

Pinangunahan ng 17 points ni Roi Sumang ang Blackwater, may 14 si Mike DiGregorio at 13 kay Allein Maliksi.

Sa first game, rumes­ponde ang bench ng Alaska sa kakulangan ng tao para itumba ang Columbian Dyip 94-72.

Injured pa sina Vic Manuel, JVee Casio, Kevin Racal at Simon Enciso pero nakabawi ang Aces mula sa 85-72 overtime loss sa Rain or Shine sa kanilang season debut noong Linggo.