Sinorpresa ng import-less UST ang bigating BaliPure 21-25, 25-21, 25-23, 25-13 sa tampok na laro ng Shakey’s V-League Season 13 Reinforced Conference kagabi sa PhilSports Arena sa Pasig.
Naka-recover mula sa isang set na pagkakaiwan ang Tigresses, nang magising ay hindi nagpaawat para kolektahin ang pangatlong sunod na panalo sa gayunding dami ng laro.
Nasa unahan na ng pulutong ang mga taga-España.
Nagtulong sina team captain Pam Lastimosa, EJ Laure, Ria Meneses at sophomore Carla Sandoval para biguin ng UST ang BaliPure na ipinagmamalaki ang kanilang imports na sina Kate Morrell at Kaylee Manns.
Hawak ng Water defenders ang 16-13 sa third set, pumalo ng 6-3 run ang Tigresses para itabla ang iskor sa 19-all.
Nabuhayan ng loob ang España-based squad at nakipagsabayan para makuha ang mahirap na panalo sa set 3.
Si Mary Pacres ang hinugutan ng lakas ng Tigresses sa third frame.
Tumapos si Laure ng 23 points para sa UST, nag-ambag sina Sandoval at Lastimosa ng 12 at 11 points.
Sa unang game, pinagdiskitahan ng UP ang Coast Guard 25-10, 25-19, 25-15 sa likod ng game-high 19 points ni Diana Carlos na kinapalooban ng 14 attack points at two blocks.