Plano ng isang senador na hilingin sa pamahalaan na linawin ang direksiyon na balak tahakin nito pagdating sa foreign policy, bunsod na rin ng magkakaibang ­pahayag ni Pangulong Rodrigo Duterte at iba pang opisyal ng gobyerno.

Ayon kay Sen. Bam Aquino, maghahain siya ng resolusyon upang li­nawin ang isyu upang hindi makompromiso ang pambansang interes ng Pilipinas.

“Kailangan natin ma­laman kung ano ba ­talaga ang foreign policy ng administrasyon, particularly with regard to the US,” wika ni Sen. Aquino.

Nakita ni Sen. Aquino­ na kailangan ng paglilinaw matapos sabihin ni Pangulong­ Duterte sa kanyang talumpati noong Setyembre 12 na kailangan nang umalis ng tropang Amerikano sa Mindanao.

Taliwas naman dito, iginiit ni presidential spokesman Ernesto Abella na ang pahayag ni Pa­ngulong Duterte ay hindi opisyal na polisiya at mananatili ang sundalong Amerikano sa Mindanao.

Noong Setyembre­ 13, inihayag naman ni ­Pa­ngulong­ Duterte na hindi na sasali ang ­Pilipinas sa pinagsanib na maritime patrols kasama ang US upang maiwasan ang karahasan.

Ngunit noong ika-15 ng Setyembre, napaulat na sinabi ni Department of Foreign Affairs Secretary Perfecto Yasay na tuloy ang joint patrol kasama ang US dahil ito’y pangako natin sa mga Amerikano.

Nabanggit din ni ­Pa­ngulong­ Duterte na plano ng bansa na bumili ng mga gamit ng mili­tar mula Russia at China.

Agad naman itong nilinaw ni Abella sa pagsasabing tutuparin ng ­Pilipinas ang anumang kasunduan nito sa ­Estados Unidos.

“Given recent conflicting statements from the President and govern­ment representatives, there is a need to clarify government’s approach to foreign relations and ensure a clear and coherent foreign policy towards ensuring our national interest,” wika ni Sen. Aquino.