Sinampahan ng kasong defamation o paninirang-puri ng Rizal Commercial Banking Corp. (RCBC) sa Manila Regional Trial Court ang central bank ng Bangladesh dahil sa matindi umanong pag-atake nito kaugnay sa $81 milyong cyber heist tatlong taon na ang nakakalipas.
Kabilang sa respondent ng isinampang kaso sa Manila RTC noong Marso 6 sina Bangladesh Bank Deputy Governor Abu Hena Mohammad Razee Hasan at iba pang opisyal nito na nasa Maynila.
Magugunita na noong Pebrero 2016 ay natangay ng mga hindi pa nakikilalang hacker ang $81 milyon mula sa Bangladesh bank account na may New York Federal Reserve at inilipat ang pera sa apat na RCBC account sa Makati City.
Si dating RCBC branch manager Maia Deguito ay nahatulan noong Enero 10 dahil sa kasong money laundering kaugnay sa $81 milyong cyber heist.
Iginiit ng RCBC na wala sa kanilang poder ang sinasabing pera ng Bangladesh.
Nauna rito ay idinemanda ng Bangladesh ang RCBC sa isang korte sa New York.