Binawi ng Bureau of Internal Revenue (BIR) ang kanilang kautusan na patawan ng buwis ang premium na binabayad ng mga employer para sa health card ng mga empleyado.

Kumambyo ang BIR matapos palagan ni Senador Sonny Angara, chairman ng Senate committee on ways and means, ang ipinalabas na Revenue Memorandum Circular (RMC) 50-2018 kung saan isinasaad dito na ang health card premium ay kasama sa komputasyon ng P90,000 tax-free privilege ng mga empleyado.

Kinuwestyon ni ­Angara ang ginawa ng BIR dahil magreresulta ito sa pagliit ng bonus at benepisyong exempted sa buwis. Idinagdag pa niyang hindi naman nakapaloob sa Tax Reform for Acceleration and Inclusion (TRAIN) Law ang pagpataw ng buwis sa health card.

“…The implementation of the pertinent provisions under RMC No. 50-2018 relative to the group health insurance premium and director’s fees, which were not affected by the provisions of the TRAIN Law, are hereby deleted from RMC 50-2018,” ayon sa nilalaman ng RMC No. 96-2018 na inisyu ni BIR Commissioner Cesar Dulay.