Mga laro ngayon (FilOil Flying V Centre)
4:15 pm — Pilipinas-Blue vs. Pilipinas-Red (m)
7:00 pm — Pilipinas-Blue vs. Pilipinas-Red (w)
Labu-labo ang best volleyball players sa bansa para sa slots sa 18-man national team sa Clash of Heroes ngayon sa FilOil Flying V Center sa San Juan.
Doubtful participant si former Ateneo star Alyssa Valdez ng Pilipinas-Blue team na katunggali ang Pilipinas-Red squad ni Aiza Maizo-Pontillas ng Petron sa main game ng hambalusan na binabalangkas ng PSC-POC Media Group sa pakikipagtulungan ng Larong Volleyball sa Pilipinas, Inc. at pinadrinuhan ng Philippine Sports Commission, official insurance provider UCPB Gen, at official broadcast partner TV5.
Makikipagpasiklaban si reigning NCAA MVP Johnvic de Guzman at Pilipinas-Blue team sa Pilipinas-Red squad na babalikatin ni UAAP MVP Marck Espejo sa men’s match.
Ito ang final leg ng tryouts para sa national team na isasabak sa Southeast Asian Games sa Kuala Lumpur sa August 19-31.
Pinagbawalan na sumali sa event ang pinakasikat na player ng bansa na si Valdez ng kanyang mother club Creamline, sa palusot na makaiwas injury sa krusyal na Premier Volleyball League second round eliminations.
Mukhang kulang sa asim ang Clash of Heroes dahil wala nang Alyssa ay baka mag-sit out din sina PVL stalwarts Myla Pablo at Elaine Kasilag ng Pocari Sweat at Grethcel Soltones ng BaliPure.
Dahil dito, nasa alanganin ang kanilang puwesto para sa national team lalo’t giniit ng LVPI na ito ang basehan ng pilian para sa komposisyon ng national team.
“The first thing we want to see in these aspirants is their commitment,” sabi ni national women’s team coach Francis Vicente. “This event is the ultimate test not only to their skills and talent, but also to their character and commitment to serve the national team.”
Makakatuwang ni Valdez – sakaling mag-surprise appearance – sa Blue squad sina Kim Fajardo, Mika Reyes, Kim Dy, Dawn Macandili, Ria Meneses, at Frances Molina.
Mapapasabak sila sa Red squad nina Maizo-Pontillas, Aby Maraño, Denden Lazaro, Jaja Santiago, Gen Casugod, at Rhea Dimaculangan.
May livestream sa Sports5.ph ang men’s match, ang women’s ay live sa TV5.