Hindi lang mga korap at pasaway na pulis, kundi kasama ring ipapatapon ni Pangulong Rodrigo Duterte sa Mindanao ang mga opisyal at tauhan ng gobyerno na tiwali.

Ito ang paalala ng Pa­ngulo sa ayaw pa ring tuminong mga opisyal nang gobyerno nang dumating sa Davao International Airport kahapon ng madaling-araw mula sa tatlong araw na pagdalo sa ASEAN Summit sa Laos.

“When I said that corruption will stop, it will stop. Maniwala kayo… to all government, ‘wag ninyo akong hiyain dito,” muling paalala ni Pangulong Digong.

Binigyang-diin ng Pangulo na hindi siya mangingiming italaga ang mga tiwaling opis­yal ng gobyerno sa Basilan o Sulu.

“I am planning to put an extension office of the national government, I plan to put it in Basilan or Jolo. Be my guest, I will be happy to assign you there,” pahayag pa ni Duterte.

Sinabi pa nitong karamihan sa mahihirap na Filipino ay biktima ng katiwalian sa gobyerno.

“Huwag ninyong galawin ang maliit na tao, kasi sila ang nanga­ngailangan ng gobyerno­. Wala nang pahinga ang tao sa kanyang paghihirap,” paalala pa ng Pa­ngulo sa mga tiwa­ling opisyal at tauhan ng gobyerno.

Nangako rin itong magpapakalat ng mga closed-circuit television cameras (CCTVs) sa lahat ng tanggapan ng gobyerno.

“I will place came­ras there, like a Gestapo. And it’s perfectly alright for me. Why? This is go­vernment. This is not a private enterprise. There is no such thing as a vio­lation of privacy there,” pahayag pa nito.