Ang Samson Road sa Caloocan City ay ipinangalan kay Apolonio Samson. Isa siyang opisyal ng Katipunan na nakipaglaban kasama ni Andres Bonifacio sa mga Kastila.
***
Ang kalye ng Tayuman sa lungsod ng Maynila ay ipinangalan sa isang uri ng halaman na dating sagana sa nasabing lugar na tinatawag na tayum. Mula sa dating San Lazaro Hippodrome sa Sta. Cruz, ang kahabaan nito ay umaabot hanggang sa Pritil sa Tondo. Bahagi ng Circumferential Road 2 o C-2 ang kalye ng Tayuman.
***
Si Ambrosio Rianzares Bautista na isang abogado ang may-akda ng Declaration of Philippine Independence. Isinilang siya sa Biñan, Laguna at malayong kamag-anak ng pamilya ni Gat Jose Rizal.
***
Ang Palanan ay isang bayan sa probinsya ng Isabela. Malayo ang bayan na ito sa buong lalawigan ng Isabela. Mararating lamang ito sa pamamagitan ng eroplano o bangka. Sa Palanan nahuli ng mga sundalong Amerikano ang grupo ni Emilio Aguinaldo.
***
Ang dating pangalan ng Liwasang Bonifacio sa lungsod ng Maynila ay Plaza Lawton. Ipinangalan ito sa Amerikanong heneral na si Henry Ware Lawton. Siya ang pinakamataas na opisyal ng mga sundalong Amerikano na nasawi noong Philippine-American War sa sagupaang naganap sa Morong, Rizal.
May isang siyudad sa Oklahoma na ipinangalan din sa kanya.
***
Ang Parish of Our Lady of the Abandoned o Nuestra Señora de Los Desamparados na kilala rin sa tawag na Santa Ana Church ay matatagpuan sa lungsod ng Maynila. Matatagpuan dito ang National Cultural Treasures na dineklara ng National Museum. Ito ay ang Santa Ana Site Museum na nasa patio ng kumbento at ang Camarin de la Virgen, isang chapel room kung saan nakalagay ang imahen ng Our Lady of the Abandoned.