Nauwi sa pagwo-walk out kagabi ni Senadora Leila De Lima ang pagdinig ng Senate committe on justice and human rights kaugnay sa extrajudicial killings.

Nag-ugat ito makaraang lumitaw sa kasagsagan ng pagdinig ang impormas­yon ukol sa kasong kidnapping with ransom na isinampa laban kay self-confessed hitman Edgar Matobato sa National Bureau of Investigation (NBI) noong taong 2000.

Lumitaw na ang natu­rang impormasyon ay alam na umano noon pa ni De Lima ngunit hindi nito binanggit sa nagdaang pagdinig.

Ito ang dahilan ng pag-init ng ulo ni Senador Richard Gordon, chairman ng komite na kung saa’y inakusahan nito si De Lima­ ng pagtatago ng impormas­yon o “concealment” of ­information.

Ngunit hindi naman matanggap ni De Lima ang naturang akusasyon ni Gordon na dahilan upang tuluyan na itong mag-walk out.

“It pains me to be accused of material concealment, I am walking out, I’m sorry,” ayon pa kay De Lima sa pagwalk out nito.

Sa ambush interview matapos ang pag-walk out, iginiit ni De Lima na walang siyang itinatago dahil sinabi na rin umano ni Matobato sa pagdinig ang kaugnay sa kasong isinampa sa kanya.

“Nasaan ‘yung concealment kung na-disclose na ‘yun, ang pinaka-ayaw ko ay ‘yung inaakusahan ako ng kung ano-ano,” ayon pa kay De Lima.

Bago pa ang walk-out, nagkaroon na rin ng tensiyon sa pagdinig makaraang malaman naman ni Gordon na umalis na sa Senado si Matobato nang hindi nagpaalam sa komite.