Ipinatawag ng Senate committee on public services ang Davao-based businessman na si Dennis A. Uy at ilang opisyales ng gobyerno para sa ikatlong Senate investigation hinggil sa ikatlong major telecommunications company o telco.
Sinabi ni Senadora Grace Poe, chair ng naturang komite, na inaasahan nito ang pagdalo ni Uy para talakayin ang compliance ng Mislatel Consortium – binubuo ng Udenna Corp., Chelsea Logistics at Chinese state-owned China Telecommunications Corp. – matapos itong sumalang sa 90-day review process.
Inaasahan din ng senadora na maihahatid ng ikatlong telco ang mga pangakong mapabuti ang serbisyo ng telecommunications sa bansa.
“We hope that this third telco lives up to its promise to improve the telco services in the country because there will be more competition in the industry,” sabi ni Poe.
“Gusto talaga nating magtagumpay ang third telco pero kaakibat nito, dapat mapawi ang mga agam-agam sa seguridad ng ating bansa,” dagdag nito.
Kabilang sa mga inimbitahan ay si Pampanga-based businessman Dennis Anthony H. Uy, may-ari ng telco provider Converge ICT Solutions Inc., na napaulat na may interes ring makianib sa Mislatel para suportahan ang operation ng third telco.
Sa Enero 24 ng dakong alas-10 ng umaga nakatakdang i-resume ang pagdinig sa third telco.