Nangunguna sa listahan ng mga posibleng maging flag bearer ng bansa para 30th Southeast Asian Games si 2016 Rio de Janeiro Olympics weightlifting silver medalist Hidilyn Diaz.
Isa ang 28-year-old at Zamboanga City native sa mga napupusuang maging flag bearer gaya nina 2018 Doha World Artistic Gymnastics Championships bronze winner Carlos Edriel Yulo, 2018 Palembang Asian Games skateboarding gold medalist Margielyn Didal at 2018 Asiad women’s golf champion Yuka Saso.
Hinayag ng naatasang si Team Philippines chef de mission Manuel Monsour del Rosario III na puwede pa aniyang madagdagan ang listahan kung may indibidwal na atletang makaka-gold medal bago mag-Nobyembre.
“Puwera na lang kung may mag-uwi ng gold medal or world champion bago mag-November,” ani Del Rosario Huwebes ng hapon.
“Hindi natin alam, pero baka may lumutang pa,” panapos ng Philippine Taekwondo Association secretary-general.