Hindi napigilan ni Pangulong Rodrigo Duterte ang bugso ng damdamin at napaiyak dahil sa masamang epektong idinulot ng iligal na droga sa bansa.
Sa kanyang talumpati sa kick-off rally ng Partido ng Demokratikong Pilipino -Laban (PDP-Laban) sa Biñan City, Laguna, inisa-isa ng Pangulo ang masamang epekto ng iligal na droga sa bansa.
Kapag aniya nalulong sa droga ang isang tao ay gagawa ito ng paraan para masustentuhan ang bisyo at nasisira din ang pamilya dahil nag-iiba ang asal ng isang drug addict.
Masakit din aniya ang karanasan ng ilang overseas Filipino worker na nagpapakahirap magtrabaho sa abroad at nagsasakripisyo sa pag-aakalang nag-aaral ang mga anak pero ‘yun pala ay lulong sa iligal na droga.
Sinabi ng Pangulo na panahon pa ni dating Fidel Ramos ay nag-warning na ang Drug Enforcement Agency ng Amerika na ang Pilipinas ay magiging narcopolitics kaya hindi siya nagtataka kung bakit lumala nang husto ang problema sa iligal na droga pag-upo nito sa puwesto.
“Ayaw ko talagang ganonin mo ang Pilipino. Napaiyak ako, ako sa bayan ko. Hindi, may allergy ako sa helicopter pagbaba. Bawal man mag-helicopter ‘pag gabi. Pag-landing amoy kusina. Amoy ulam,” anang Pangulo.