“Gumagana ba ang disciplinary bodies laban sa mga abusadong miyembro ng Philipine National Police?”
Ganito ang tanong ni Kabayan party-list Rep. Harry Roque dahil sangkatutak, aniya, ang disciplinary bodies na kinabibilangan ng National Police Commission (Napolcom), Internal Affairs Service (IAS), People’s Law Enforcement Board (PLEB) subalit mistulang hindi ramdam ang mga ito sa dami ng mga pulis na nagkakasala.
Ayon kay Roque, bukod sa hindi nararamdaman ng taumbayan mga disciplinary authorities na ito, ay masyadong mabagal umano ang mga ito sa pagpapataw ng parusa sa mga nagkakasalang pulis.
Sinabi ni Rogue na walang nang naririnig ang publiko kung mayroong naparusahan sa “hidden jail” sa Station 1 ng Manila Police District (MPD) sa Tondo, Manila at maging ang mga sangkot sa “wheel of torture” sa Laguna noong 2014.
Dahil dito, iminungkahi ng mambabatas na gawing “central disciplining authority” ang Napolcom subalit kailangang magsagawa, aniya, ang komisyon ng motu propio investigation kapag may mga miyembro ng PNP na nagkakasala.