Nagtungo sa National Bureau of Investigation–Death Investigation Division (NBI-DID) ang driver ng kotseng nakabangga ng nasawing motorcycle rider na si John Dela Riarte para ihayag na nakahanda siyang makipagtulungan sa isinasagawang imbestigasyon ng binuong joint task force sa insidenteng nangyari noong Hulyo 29 ng umaga sa Makati City.
Dakong alas-3:20 ng hapon kahapon nang dumating sa NBI-DID si Eric Fajardo kasama ang kanyang abogadong si Atty. Ricardo Chan.
Nabatid na babalik sa NBI-DID si Fajardo para magsumite ng kanilang affidavit at ebidensya kaugnay sa pangyayari na nag-ugat kung bakit inaresto si Dela Riarte na humantong sa pamamaril sa kanya ng isang tauhan ng Philippine National Police-Highway Patrol Group (PNP-HPG).
Samantala, inaasahan din ng NBI-DID na darating ngayon ang dalawang miyembro ng PNP-HPG na sina PO3 Jeremiah De Villa at PO2 Jonjie Manon-og para magbigay ng kanilang salaysay kaugnay sa naganap na insidente.