Sesemplang umano ang popularidad ni Pangulong Rodrigo Duterte kapag itinuloy ng kanyang mga economic managers ang planong patawan ng dagdag na excise tax ang mga produktong petrolyo.
Ito ang ibinabala ni Albay Rep. Edcel Lagman sa press briefing kahapon kaugnay ng plano ng mga economic managers ni Duterte upang mapondohan ang ambisyon ng mga ito na mga infrastructure projects na nagkakahalaga ng P8 trillion hanggang P9 trillion.
“They will have to weigh that very carefully because they might be losing their popular capital,” pahayag ni Lagman.
Sa ngayon ay napakataas pa ang popularity rating ni Duterte na base sa mga survey ay naglalaro pa ito sa 83% na inuugnay sa pagsuporta ng publiko sa kanyang anti-illegal drug campaign.
Gayunpaman, sinabi ni Lagman na hindi malayong mawala ang popularidad ni Duterte kapag nasaktan na nang todo ang mayorya sa mga Filipino… ang mga mahihirap, kapag natuloy ang dagdag na buwis sa mga produktong petrolyo.
Sa ngayon ay umaabot lamang sa P4.35 ang excise tax ng mga produktong petrolyo maliban sa diesel na libre sa buwis subalit nais ng mga economic managers na itaas ito sa P10 bawat litro.
Hindi rin ililibre ang diesel na karaniwang ginagamit ng transport sector dahil papatawan na ito ng excise tax kaya kapag nangyari ito ay masasaktan, aniya, nang todo ang mga karaniwang tao.
Sa ngayon ay nanahamik lamang, aniya, ang mga tao subalit aalma na ang mga ito kapag ang sikmura na ng mga ito ang nakataya at ang kapalit nito ay ang popularidad ng Pangulo.