E-power puwedeng bawiin kapag inabuso

grace-poe

May kapangyarihan­ ang Kongreso na bawiin­ ang ipagkakaloob nitong­ emergency powers kay Pangulong Rodrigo Duterte oras na makitang hindi nito ­sinunod ang mga itinakdang kondisyon at nagkaroon ng pang-aabuso.

Ito ang paglilinaw ni Senador Grace Poe, chairman ng Senate Committee on Public Service, na siyang humahawak ng pagdinig kaugnay sa panu­kalang pagkakaloob ng emergency powers sa ­Pangulo upang resolbahin ang problema sa trapik.

Ayon pa kay Poe, hindi­ siya tutol bukod sa hindi naman siya takot na pagkalooban ng emergency­ powers ang Pangulo upang resolbahin ang traffic sa Metro Manila dahil panahon na upang bigyang solusyon ang lumalalang problema ng trapik sa Met­ropolis na araw-araw nang kalbaryo ng taumbayan.

Ngunit sa kondisyon na malinaw ang intensiyon ng ipagkakaloob na kapangya­rihan at kung saan at hanggang kailan ito dapat gamitin.

“Mayroong kapangya­rihan ang Kongreso at Senado na bawiin ito ‘pag hindi sinusunod ng gobyerno ‘yung mga nakatala dito,” ayon kay Poe.

Paglilinaw ng senadora­ na magiging mahigpit at detalyado ang bubuuin nilang emergency power para sa Pangulo.

“Sa emergency powers na maibibigay natin kaila­ngang may deadline. Nakadetalye kung anu-ano lang ang pwedeng paggamitan nito,” dagdag ni Poe.