Kalbaryo na naman ang daranasin ng mga motorista at mananakay ngayong weekend bunsod ng road re-blocking na gagawin ng Department of Public Works and Highways (DPWH) at pagkukumpuni ng isang kompanya ng tubig sa ilang mga kalye sa Metro Manila.
Sa abiso kahapon ng Metropolitan Manila Development Authority (MMDA), simula alas-11:00 kagabi (Nobyembre 23) ay isinara ang bahagi ng Southbound ng C-5 Road tabi ng SM Aura (4th and 5th lane from median), C-5 Road bago mag Pasig Boulevard, C-5 flyover, EDSA-Scout Albano malapit sa Shell Gasoline Station (beside sidewalk) at Scout Borromeo malapit sa GMA 7 (2nd lane from sidewalk) bunsod ng isasagawang road re-blocking.
Kabilang din ang Northbound ng EDSA harap ng Northstar Motor Corp. (1st lane sidewalk), Batasan Road malapit sa CSC Central Office at Mindanao Avenue Mindanao tunnel hanggang Old Sauyo footbridge (trucklane).
Magsasagawa rin ng concreting road restoration sa Quirino Highway (SB) mula panulukan ng Mindanao Avenue hanggang Villa Sabina (1st lane from sidewalk), Mindanao Avenue (NB) mula Lukara St. hanggang Socorro St. (1st lane from sidewalk), Road 10 (NB) Visayas Avenue – Road 1 intersection (1st lane from sidewalk).
Ang nabanggit na mga kalye ay magiging passable para sa mga motorista alas-5:00 ng umaga ng Lunes (Nobyembre 26).
Abiso ng MMDA sa mga motorista na iwasan ang nabanggit na mga kalye at dumaan na lamang sa mga itinalagang alternatibong ruta para huwag maabala.