Pinaalalahanan ng Department of Labor and Employment (DOLE) ang mga employer sa pagbabayad sa mga idineklarang holiday ngayong Disyembre.
Sa ipinalabas ni Labor Secretary Silvestre Bello III na Labor Advisory No. 19 series of 2018, kaugnay ito sa tamang pagpapasahod sa Disyembre 8, 24 at 31 na special non-working holidays at Disyembre 25 at 30 na regular holidays.
Kung ang mga empleyado ay hindi nagtrabaho, ang patakaran na “no work, no pay” ang dapat gamitin maliban na lamang kung may polisiya ang kompanya o Collective Bargaining Agreement (CBA) na nagtatakda ng kabayaran para sa mga special holiday.
Dapat umanong bayaran ang empleyado ng karagdagang 30% para sa kanyang arawan na sahod para sa unang walong oras. Habang ang mga empleyado na nag-overtime ng mahigit sa 8 oras ay dapat na bayaran ng 30% ng kanyang orasang kita.
Kung ang empleyado ay nagtrabaho sa araw ng kanyang day off, dapat siyang bayaran ng karagdagang 50% sa unang walong oras at COLA.
Kapag ang mga empleyado naman ay hindi nagtrabaho sa regular holiday, babayaran pa rin siya ng 100% ng kanyang suweldo sa isang araw, gayundin ng kanyang COLA.
Kung nagtrabaho naman ay babayaran ng 200% at COLA at kung nag-overtime ay babayaran ng karagdagang 30% kada oras.