Isang retiradong US soldier ang inaresto nang salpukin ng kanyang minamanehong pick-up ang isang tricycle na nagresulta sa pagkasawi ng isang pasahero at pagkasugat ng apat na iba pa sa ­Ormoc City kahapon ng umaga.

Naghihimas na ngayon ng rehas ang suspek na si retired American soldier Matthew del Robert, 46, matapos dakpin pagkatapos ng aksidente.

Napag-alaman na minamaneho ni Del ­Robert ang kanyang pick-up sa National Highway ng ­Barangay Ipil nang mag-overtake ito pero ­nawalan ng kontrol kaya sumalpok sa tricycle bandang alas-sais ng umaga.

Dahil sa lakas ng banggaan ay nasawi ­bunga ng pagkakabagok ng ulo matapos tumilapon sa ­sinasakyang tricycle ang isa sa mga sakay ng ­tricycle na si Sitay Villaluz, 79, habang sugatan ang apat na iba pa.