Mukhang hindi ubra ang Federal System of government para maputol na ang pamamayagpag ng mga political clans sa mundo ng pulitika bagkus ay lalawak pa ang kanilang teritoryo.
Kung sa kasalukuyang sistema ay hanggang sa kanilang probinsya lang makapangyarihan ang isang political clans.
Sa federal system, sasakupin na nila ang ibang probinsya na nasa loob ng isang rehiyon na nagsama-sama sa isang Federal State.
Lalawak na ang kanilang kapangyarihan, hindi lang sa pulitika kundi sa negosyo sa lahat ng probinsya sa isang Federal State kaya maraming probinsya ang nagdadalawang isip sa sistemang ito.
Papaano ang hatian ng resources kung sakali? Papayag ba ang isang mayamang probinsya na ipamahagi ang kanyang yaman sa isang probinsya kasapi sa kanilang State na mahirap lang at walang naitutulong sa larangan ng buwis at likas na yaman?
Sakaling walang magdadamot, ang hatian ba ng resources sa isang state ay pantay-pantay o kaya kung sino ang malaki ang naiaambag sa kaban ng estado ang makakakuha ng malaking parte habang ang mga probinsya na walang pinagkukunan ay barya lang?
O ang makakakuha ba ng malaking pie sa resources ng isang state ay depende kung gaano kalaki ang kanilang probinsya o gaano karami ang kanilang populasyon?
Marami kasing probinsya na malalaki pero kokonti ang mga tao, maraming probinsya na maliit pero maraming tao.
Pagdating naman sa eleksyon kung sino ang governor sa isang state, magkakaroon din ‘yan ng problema dahil tiyak na mas dumami ang away para lang sa kapangyarihan dahil ang mga matitikas na pulitiko sa bawat probinsya ang maglalaban-laban.
Sa ilalim din ng Federal State, kailangang malinawan kung bawat probinsya ba ay may sariling gobernador at magkakaroon ng hiwalay na gobernador para sa Federal States tulad ng sistema sa Autonomous Region in Muslim Mindanao (ARMM) na may provincial governor at mayroong ARMM governor na kung tawagin nila ay Regional Governor tulad ng posisyon ngayon ni ARMM Regional Governor Mujiv Hataman?
***
Hindi ko masisisi ang mga sumusuporta sa pag-abolish nang tuluyan sa Sangguniang Kabataan (SK) dahil hindi naman talaga ramdam ang mga SK officials sa bawat barangay.
Itinatag ang SK noong panahon ni dating Pangulong Ferdinand Marcos kung saan ang kanyang anak na si Imee Marcos ang chairperson sa buong bansa. Hindi ko naabutan ‘yun kaya wala akong ideya kung paano sila nagtatrabaho.
Wala akong naririnig ukol sa trabaho ng mga SK official sa panahon ko maliban lamang kung mayroon silang pasayaw para makalikom ng pondo at ginagawang bonding time nila sa mga katulad nilang kabataan sa kanilang barangay.
Pero bukod diyan ay hindi sila nararamdaman lalo na sa kampanya laban sa iligal na droga sa mga barangay gayung sila ang dapat maunang kumumbinsi sa kanilang mga kapwa kabataan na iwasan ang bawal na gamot.
Minsan akong nakasaksi ng isang SK election kung saan binuhusan ng tatay ng isang kandidato ng SK chairman ang kandidatura ng kanyang anak para lang manalo. Diyan pa lang nagbibilihan na ng boto. (dpa_btaguinod@yahoo.com)
Noong panahon ni dating Pangulong Marcos KB kabataang Baranggay pero aktibo ang mga kabataan noon hindi sa pulitika, puro sa kapakanan lamang ng mga kabataan naka focus at walang masyadong budget, di tulad ngayon na may malaking budget kaya sa murang edad nila ay natututo na sila ng kurapsyon dahil kalimitan anak, pamangkin o kamag anak ang pinatatakbo para sila lang ang makikinabang sa pondo kaya mabuti pa siguro na i abolish na lang ito.
Money corrupts. But absolute hunger for money corrupts absolutely.