Female personality naghahanap ng hired killer

Maigsi lang ang kuwentong ito pero isang istorya ito na ikinakilabot ng mga magkakaumpukang taga-showbiz. Tunay naman kasing nakawiwindang ang lumabas na kuwento kung bakit matindi ang away na namamagitan ngayon sa isang pamosong female personality at sa kanyang kapatid.

Kuwento ng source, “Tinawagan kasi ng female personality ang isang pinsan niya, nagpapahanap siya ng hired killers sa kanilang probinsiya.
“May tinawagan ding pulitiko ang babaeng personalidad. Itinatanong niya kung meron ba siyang kilalang hired killers?

“Nagulantang ang pulitiko, tinawagan niya ang kapatid ni female personality. Tanong niya, ‘Ano ang matinding problema ng sister mo? Bakit siya nagpapahanap ng gun for hire?’

“Galit na galit ang kapatid ng female personality, mula nu’n, e, hindi na niya kinakausap ang sister niya, nakakagulantang naman kasi talaga ang kuwentong nakarating sa kanya!” madiing kuwento ng impormante.
Nakakaloka! Ano na ba ang nangyayari kay sister?
***

Magaling na aktor, bad breath

Kailangan sigurong gumamit ng mouthwash ang isang kilalang aktor na madalas mapanood sa pelikula at telebisyon. Lumalabas na kasi ang mga kuwento tungkol sa kanyang bad breath.

Mahahaba pa naman ang pakikipagpalitan niya ng linya sa kanyang mga kasamahan sa serye, maging ang magaling na aktres na palagi niyang kaeksena ay nahihirapan na rin, meron kayang puwedeng magsabi sa magaling pa namang aktor na ito na maging matalas siya sa kanyang personal hygiene?

Sabi ng aming source, “Nu’ng nagkasama sila ng isang sexy actress sa isang movie, nu’n unang pumutok ang kuwento tungkol sa bad breath niya.

“Nauungkat na naman ‘yun ngayon dahil very visible siya. Malaki naman ang kinikita niya, kayang-kaya niyang bumili ng kahit kahun-kahong mouthwash, bakit pinababayaan niyang pinagtsitsismisan siya sa set ng serye nila?” huling komento ng aming source.

***

Gretchen iniyakan si Claudine

Palaging mas matimbang ang dugo sa kahit anong laban ng buhay. Puwedeng magkaroon ng hindi pagkakaunawaan ang magkapatid pero kontra sa iisang kalaban ay magkakampi pa rin sila.

Matagal ding nagkaroon ng gap ang magkapatid na Gretchen at Claudine Barretto. Lantad ang kanilang away nu’n, sagutan sila nang sagutan, pinagpistahan ng buong bayan ang kanilang labanan.

Pero hindi puwedeng bilhin ang kanilang pagkakapatiran, sa isang sitwasyong may kumakalaban sa kanila, siguradong hindi sila magdadamutan ng suporta.

Alam na alam namin kung gaano kamahal ni Gretchen si Claudine. Nu’ng kasagsagan ng kanilang pagsasagutan ay iniiyakan ‘yun ni Gretchen. Mahal na mahal niya ang kanilang bunso.

Minsan ay naikuwento ni Gretchen na magkabuhol ang pusod nila ni Claudine. Kapag mabigat daw ang gising niya ay si Claudine agad ang pumapasok sa kanyang isip.

Tatawagan niya agad ang mga kaibigan ng kanyang kapatid, inaalam niya kung ano ang sitwasyon ni Claudine, at tama ang kanyang kutob na may pinagdadaanan nga ang mahal nilang bunso.

Hindi kailanman makakalimutan ni Gretchen ang kaligayahang ibinigay ni Claudine sa kanilang pamilya. Bahagya pa lang daw na umaangat sa lupa si Claudine ay puro kasiyahan na ang ibinibigay sa kanila.

“Ask her to sing and she will not disappoint you. Kahit mali-mali ang lyrics, kakanta talaga siya. Ask her to dance, meron pa siyang mga props.

“Paano ko makakalimutan ang joy na maliit pa lang siya, e, ibinibigay na niya? Mahal na mahal ko si Claudine, bunso namin siya, e!” kuwento ni Gretchen.

Kurutin mo si Claudine at susuntukin ka ni Gretchen. Mahalin mo si Claudine at mas mamahalin ka ng aktres. Ganu’n na ganu’n.