Ang Foton at Petron – nagbuno sa finals noong nakaraang taon pa rin ang solidong paborito sa 2016 Philippine Superliga Grand Prix na pakakawalan sa Oct. 8 sa FilOil Flying V Center sa San Juan.
Magma-martsa ang Foton Tornadoes sa inter-club tourney na may matitikas na imports, nag-upgrade ang roster at may bagong coach.
Balik si dating MVP Lindsay Stalzer kasama ang kapwa American na si Ariel Usher sa Tornadoes, reunited ang magkapatid na Dindin Manabat at Jaja Santiago. Nabingwit pa si coach Moro Branislav ng Serbia na magtitimon din sa PSL-F2 Logistics Manila sa FIVB Women’s Club Championship sa Oct. 18-23 sa MOA Arena.
“Foton team has all the right pieces to win the PSL title,” ani Branislav, 59, galing sa pagku-coach sa club teams sa Yugoslavia, Greece, Romania, Saudi Arabia, Libya, Kuwait, Belarus at North Korea. “My job is to put together all those pieces and complete the championship puzzle.”
Sina Dindin at Jaja ang aangkla sa depensa sa net kasama sina Angeli Araneta at Maika Ortiz. Tulong-tulong sina Stalzer, Usher, Patty Orendain, EJ Laure at Sisi Rondina sa opensa.
Nagbalasa rin ang Petron Tri-Activ Spikers, kinuha si Stephanie Niemer at 6-foot-5 Serena Warner. Bagong coach si Shaq Delos Santos na matagal naging chief deputy ni dating head coach George Pascua.
Nakuha rin ng Petron si April Ross Hingpit mula Cignal pansuporta kay setter Acy Masangkay, kasama sina spikers Frances Molina, Aiza Maizo-Pontillas at CJ Rosario.