FOTON UMISA RIN SA THAILAND

Sa ikatlong subok, tumikim din ng panalo ang Foton Pilipinas sa 2016 Select Tuna Thailand Volleyball League nang pagdiskitahan ang Rangsit University 25-23, 25-19, 25-20 sa Wi Sommai gym sa Sisaket Province.

Nagliyab sa opensa si American import Lindsay Stalzer sabay ng pag-ako ng iba pang Tornadoes sa trabaho sa depensa at pumasok sa win-co­lumn ang squad ni ­Italian coach Fabio Menta.

Nagpakawala si ­Stalzer ng 27 hits, nagsumite ang kapwa niya reinforcement na si ­Ariel Usher ng 14 markers – karamihan sa first two sets kaya nagawang ilabas ni Menta para bigyan ng exposure sina UST stars Cherry Rondina at EJ Laure.

Hindi na ­nakasingit ang kalaban, matikas na tinapos ng Foton ang pa­nalo kahit nag-all-­Filipino na sa third set si ­Menta kina Rondina, Laure, Rhea ­Dimacula­ngan, Patty Orendain, Aby ­Marano at Maika Ortiz. Naglista ng ­seven hits si Ortiz sa deciding set.

“I did give playing time to Laure and Rondina, our future stars, and I need to see them with the responsibility of winning a game with no ‘outside help,’” ani Menta.

Hindi masyadong gina­mit ni Menta sina Stalzer at ­Usher para bigyan ng maximum exposure ang locals na ­babandera sa team sa Philippine­ Superliga Grand Prix sa October. Gina­mit din ng Foton ang Thailand tourney bilang pagha­handa sa AVC Asian Wo­men’s Club Championship sa Sept. 3-11 sa Alonte Sports Center sa Binan.

“I wanted Filipino players to gain maximum international exposure,” paliwanag ni Menta. “So, for the first two sets, I played win one import at a time, Stalzer in the first and Usher in the second.”

Unang natisod ang Tornadoes sa PEA ­Sisaket, sunod sa ­Bangkok Glass at tinapos ang Group A sa 1-2. Ang top 2 teams mula Groups A at B ang aabante sa semifinals.

Sabado ng ­umaga ay haharapin ng ­Foton ­Pilipinas ang ­Kasetsart University.