Pagkatapos ng Cagayan de Oro festivities, tatawid ng Lucena sa Quezon ngayong Huwebes ang PBA at Gilas Pilipinas delegation para sa isa pang All-Star extravaganza tampok ang Skills competitions.
Ang PBA Luzon selection naman ang tatasa sa Gilas Pilipinas sa laro sa Biyernes na hatid ng HMR Trading, Mueller, Peak, Crystal Clear, Anako, Davco, Smart, Cloudfone at Petron.
Highlight ng Lucena event ay ang announcement ni national coach Chot Reyes ng kanyang Final 12 na isasabak sa SEABA Championship sa May 12-18 sa Smart Araneta Coliseum.
Kasama sa nakalinyang All-Star side events ang pagdepensa nina Rey Guevarra, Terrence Romeo at Maverick Ahanmisi sa kani-kanilang titulo. Makakasama ni Reyes sina PBA Commissioner Chito Narvasa at Quezon Gov. David Suarez sa paghahayag ng Gilas 12 pagkatapos ng Gilas-PBA Luzon showdown.
Bubuo sa Gilas roster sa Lucena sina Matthew Wright, Bradwyn Guinto, Carl Bryan Cruz, Kevin Ferrer, Mike Tolomia, Arnold Van Opstal, Ed Daquioag, Almond Vosotros, Jonathan Grey, Raymond Almazan, Norbert Torres at Allein Maliksi.
Babandera sa PBA cast sina Gilas veterans Japeth Aguilar, Calvin Abueva at Jayson Castro, kasama sina Alex Cabagnot, LA Tenorio, Marcio Lassiter, Stanley Pringle, Jay Washington, Paul Lee, Mark Caguioa, Arwind Santos at Ranidel de Ocampo. Coach si Leo Austria.
Idedepensa ni Ahanmisi ang Obstacle Challenge crown, susubukang pantayan ni Romeo ang three-peat ni Mark Macapagal mula 2010-12 sa three-point shootout, hahabulin ni Guevarra ang four-peat sa slam-dunk contest.