EXCITED si Gina Alajar sa kanyang pagbabalik-Cinemalaya siya this year.
Kasama ang premyadong actress-director sa unang Cinemalaya filmfest nu’ng 2005 with the indie film Batad: Sa Paang Palay na gustung-gusto namin.
Ang sumunod niya ay Sigwa nu’ng 2010 at ikatlo niya ang Nabubulok ngayong 2017.
Natatawang kuwento ni Gina, in fairness ay nag-improve na ang kondisyon ng indie actors at medyo mas komportable na ngayon ang shooting ng indie films.
Meron na silang tent na may aircon at pati banyo nila sa set ay may aircon na, tapos ay hiwalay ang babae at lalaki.
Improvement na ‘yon kumpara nu’ng mga unang taon ng Cinemalaya.
Maging ang talent fee (TF) nila ay two notches higher than before, sabi ni Direk Gina.
Hindi pa siya nagwawagi ng Balanghai trophy for Best Actress, pero hindi siya nag-e-expect sa Nabubulok.
Enjoy lang siya na gumawa sa Cinemalaya, walang pressure. Wala sa isipan niya na pang-award ang ginawa niya, pero kung ibibigay sa kanya ay iwewelkam niya ito.
Naintriga siya sa baguhang direktor na si Sonny Calvento (anak ni Mr. Tony Calvento) kaya pumayag siyang mapasama sa cast ng first movie nito.
Tsismosang kapitbahay ang role ni Ms. Gina sa suspense-thriller na Nabubulok.
Ang kanyang pinsan (Sue Prado) na kasal sa Amerikano ay bigla na lang nawala isang araw, kaya gumawa sila ng sarili nilang imbestigasyon.
Kagabi ang opening night ng Cinemalaya sa CCP na opening film ang award-winning Birdshot.
Proud ang Cinemalaya na nu’ng magsimula sila back in 2005 ay nasa 8K lang ang kanilang audience.
Nitong 2015 ay umabot na sa 100K ang nanonood ng most prestigious indie filmfest ng bansa.
Ngayon (August 5) magsisimulang mapanood ang 9 full-length films at 12 short films ng 13th Cinemalaya sa CCP at sa TriNoma (Cinema 1), Greenbelt 1 (Cinema 1 & 2), Glorietta 4 (Cinema 4), UP Town Center (Cinema 3), Fairview Terraces (Cinema 1) at Marquee Mall sa Pampanga.