Bisita sa Philippine Sportswriters Association (PSA) Forum ngayong Martes sa Amelie Hotel-Manila sa Jorge Bocobo, Malate ang Gilas Pilipinas men’s basketball team upang ibahagi ang paghahanda sa nalalapit na 18th International Basketball Federation (FIBA) World Cup 2019.
Dadalo sina coach Joseller ‘Yeng’ Guiao, team captain Gabriel Daniel ‘Gabe’ Norwood at nagbabalik Kiefer Isaac Ravena upang talakayin ang kanilang magiging kampanya sa FIBA World sa China sa Agosto 31-Setyembre 15.
Makakasama rin sa sports session na mga hatid ng San Miguel Corp., Braska Restaurant, Amelie Hotel at Philippine Amusement and Gaming Corporation (PAGCOR) sina team manager Gabby Cui at liaison officer Yvette Ruiz.
‘Di rin magpapahuli sa weekly forum ang ilang MILO officials at si Gilas Pilipinas girls team member Ella Fajardo na ibabahagi ang matagumpay na bronze medal finish sa FIBA 3×3 U-18 Asia Cup sa Cyberjaya, Malaysia.
Makakasalo ni Fajardo, na isang BEST Center graduate, sina MILO Sports Executives Lester Castillo at Luigi Pumaren, at BEST Center founder-chairman Nicanor Jorge.
A-attend rin sa session na sisimulan sa alas-10:00 ng umaga si Gilas Pilipinas womens/girls team coach Patrick Henry Aquino. (Janiel Abby Toralba)