Positibo pa rin si coach Yeng Guiao na mailalabas ng Nationals ang tunay na laro sa dalawang krusyal na laban ng penultimate window ng 2019 FIBA World Cup Asian Qualifiers.
Parehong home games ang susunod na salang ng Team Pilipinas – kontra Kazakhstan sa Nov. 30, at laban sa Iran sa Dec. 3 sa MOA Arena.
Isa lang ang naipanalo ng Filipinos sa apat na tune-up games bago ang FIBA joust, 1-1 sa Jordan at 0-2 kontra Lebanon.
Dalawa sa inaasahan ni Guiao na lalabas ang tunay na laro kapag kinakailangan na ay sina June Mar Fajardo at Jayson Castro.
Hindi masyadong nakapag-deliver ang dalawang Gilas veterans, lalo sa 74-68 loss sa Lebanese noong Biyernes nang magsumite lang si Fajardo ng 9 points samantalang bokya si Castro.
“I think June Mar Fajardo and Jayson Castro can play better than that,” giit ng national coach.
Naging 19 na lang ang dating 20-man pool ng Team Pilipinas sa pag-atras ni Ian Sangalang na may iniindang pananakit ng tuhod at paa.
Sa bisperas ng laro kontra Kazakhs na ihahayag ni Guiao ang kanyang final 12, pati ang gagamiting naturalized player kina Christian Standhardinger at Stanley Pringle.