Hindi pa naman siguro­ sakop si incoming Subic Bay Metropolitan Autho­rity­ (SBMA) chairman Martin Diño sa inilabas na memorandum ng ­Palas­yo ng Malakanyang na ­nagbabawal magsalita sa ibang opisyal ng gobyerno­ in-behalf of President ­Rodrigo Duterte.

Alinsunod sa memo­randum ay tanging si Presidential Spokesman Ernesto Abella lamang ang pinahihintulutang magbigay ng opisyal na pahayag ng Pangulo kaugnay sa mahahalagang­ isyu. Kapag wala si Abella ay saka maaaring pumapel si Presidential Communications Office (PCO)Sec. MartinAndanar.

Kaya naman nakaka­gulat ang pagsasalita ni Diño sa isang press conference hinggil sa kontrobersyal na drug-list na hawak ni Pangulong Digong.

Nabanggit kagabi ni Diño na may 50 celebrities ang kasama sa drug list ni President Rodrigo Duterte. Hindi lamang patikim ang ibinigay ni Diño sa dinaluhan nitong­ press conference dahil sinabi pa niyang majority sa celebrities ay party drugs users at tinatayang sampu sa mga ito ay pinaghihinalaan mga  drug pushers.

Hindi naman nagpaka-atribida ang incoming SBMA chair dahil hindi niya pinangalanan ang mga sinasabing showbiz personalities na sangkot.

Pero, sinabi naman ni Diño na ang mga nasa listahan ay sumailalim na sa drug test.

Ano kaya ang magi­ging reaksyon ni PCO chief sa patikim na ito ng incoming SBMA chair? Hindi kaya mabulilyaso ang kanyang appointment dahil sa katabilan?

Huwag naman sana siyang matulad kay Ka Freddie Aguilar na iuupo na sana bilang head ng National Commission for Culture and the Arts (NCCA) ni Pangulong Duterte pero nabulilyaso.

Kaya sana huling tsika na ito ni Diño lalo na’t napakasensitibo ng isyung kanyang pinakikialaman. Kahit sino nga sa mga kasalukuyang nakaupo ay walang may lakas ng loob na magsalita tungkol sa nilalaman ng drug-list ng Pangulo kaya sana huwag na, awat na.

Kung ako kay Diño, aralin ko na lang ang mga ginagawa ng isang SBMA chair upang hindi niya mabigo si Pangulong Duterte na nagtalaga sa kanya sa puwesto.

Naunsyami ang naunang idineklarang unilateral ceasefire ni Pangulong Rodrigo Duterte kasunod ng pagkabigo ng Communist Party of the Philippines-New People’s Army (CPP-NPA) na tumugon sa ibinigay na deadline nitong Hulyo 30.

Iniutos ni PDu30 kay Presidential Adviser on Peace Process Jesus Dureza ang agarang pagsuspinde sa ceasefire at inatasan ang law enforcers na patuloy na gampanan ang tungkulin para matiyak ang national security.

Ikinadismaya ni PDu30 ang pananambang kamakailan ng makakaliwang puwersa sa tropa ng pamahalaan sa Davao del Norte kung saan isang Civilian Armed Forces Geographical Unit (CAFGU) ang nasawi at apat pa ang nasugatan.

Ang engkwentro ay hindi inaasahan ng Pangulo na ito ang isasagot ng CPP-NPA sa kanyang inisyatibo na magdeklara ng unilateral ceasefire sa mga rebeldeng komunista sa kanyang unang State of the Nation Address (SONA) noong Hulyo 25.

Bago ito ay nag-demand ang CPP-NPA na i-pullout ang mga puwersa ng gobyerno sa mga balwarte nila na mariing tinabla ng Pangulo at nanindigang ang mga isla at kabundukan sa bansa ay pag-aari ng Republika kaya’t walang dahilan para pagbigyan ang hirit ng mga rebelde.

Sa kabila ng pagbawi sa ceasefire ay tuloy pa rin ayon sa gobyerno ang itinakdang peace talks sa pagitan ng makakaliwang grupo.

Nirerespeto natin ang pagpupursige ng gobyernong Duterte na isulong ang usapang pangkapayapaan sa pagitan ng makakaliwang grupo sa kabila ng tila pagbalewala ng mga ito sa idineklarang unilateral ceasefire.

Patunay lamang ito na seryoso ang administrasyong Duterte na pagkasunduin ang magkabilang panig.

Ang mahirap lamang sa pangyayari ay hindi kinilala ng makakaliwang grupo ang inisyatibong ginawa ng Pangulo kahit man lamang sa paraang pagbaba muna ng armas bilang tugon sa tila “good will” ng pamahalaan.

Gayunman, naniniwala kaming sa bandang huli ay mananaig pa rin ang pagkakasundo lalo na’t kitang-kita sa Pangulo ang sinseridad na plantsahin ang gusot ng dalawang kampo.

Nakakabahala ang panukala ng Department of Education (DepEd) na pagsasailalim sa mandatory drug test sa mga mag-aaral sa pribado at pampublikong mga eskwelahan sa bansa.

Ang mungkahing pagsasagawa ng mandatory drug test ay isinulong upang matiyak ang kaligtasan ng mga bata sa droga para sa mas maayos nilang paglaki at kaligtasan sa lipunan.

Hindi pa aprubado ang plano pero ayon sa DepEd uunahin nila ang pagsasagawa ng random drug testing.

Bago isapinal ang mandatory drug testing ay sinimulan na ng DepEd ang serye ng mga anti-drug abuse program para higit na maintindihan ng mga kabataan ang masamang dulot ng iligal na droga.

Nauunawaan naming ang malasakit ng DepEd na tiyakin ang kalagayan ng mga mag-aaral dahil sa tumintinding problema ng bansa sa iligal na droga.

Sa ganang amin, hindi dapat na humantong agad-agad sa mandatory drug test ang ipatupad na hakbang ng DepEd.

Naniniwala kaming marami pang paraan na puwedeng gawin upang pukawin ang isipan ng mga kabataan patungkol sa epektong hatid ng iligal na droga.

Para sa amin ang mas seryosong paraan para maturuan ang mga kabataan patungkol sa epektong dulot sa katawan ng iligal na droga at masigasig na pagbabahagi sa kanila ng tamang edukasyon patungkol sa salot na problema ng lipunan ay sapat nang paraan para maisalba ang mga kabataan at hindi ang pagsalang sa mga ito sa mandatory drug test.