Patay ang isang lalaki na kabilang umano sa drugs watchlist ng Manila Police District-Police Station 11 sa isinagawang follow-up operation kahapon ng hapon sa Binondo.
Kinilala ni SPO2 Jonathan Bautista ng MPD-Homicide Section ang suspek na si Elizalde Ticman, 36-anyos at nakatira sa Alvarado St. Binondo.
Nagsasagawa umano ng follow-up operations ang mga elemento ng Anti-Illegal Drugs Unit ng MPD-Station 11 pasado alas-tres ng hapon nang makatanggap ng tawag mula sa isang concerned citizen na nagbigay ng impormasyon na nakita si Ticman sa Alvarado St. malapit sa bahay nito.
Hidi na nag-aksaya ng panahon ang mga awtoridad at pinuntahan ang lugar subalit nang makita umano ng suspek ang mga dumating na pulis sa halip na sumuko ay pinaputukan nito.
Napilitang gumanti ng putok ang mga operatiba hanggang sa tinamaan ng bala ang suspek at napatay.
Narekober din sa suspek ang isang caliber .38 revolver, limang sachet ng shabu at P4,000.00 cash.