JOMA SISON, STYLE BANDIDO — DUTERTE

Pangulong Rodrigo Duterte

Matapos sabihing magkaibigan sila, bina­natan naman kagabi ni Pangulong Rodrigo Duterte si Communist Party of the Philippines (CPP) founder Jose Ma. Sison na hindi dapat magyabang lalo at hindi naman nito kayang magpanalo ng kahit na isang barangay.

“Akala mo sino magsalita hindi nga maka­panalo ng barangay, ang style bandido,” pahayag­ ni Pangulong Duterte nang bumisita ito sa 3rd Infantry Division ng Philippine Army sa Camp Gen. Macario Peralta Jr. sa Jamindan, Capiz.

Sinabi ni Pangulong Duterte na wala sa kapangyarihan ang CPP kaya hindi naman ito dapat na magmayabang.

Wala, aniya, itong naipanalo at magaling lang sa pananambang at nasa kabundukan lamang nagkukuta.

“Akala mo they are force to reckon with, they cannot even occupy a barangay in a single day,” pahayag pa ni Duterte na nagsabing hindi kayang ubusin ng mga rebelde ang puwersa ng militar.

Tila sumiklab ang word war sa pagitan ng dalawa matapos bawiin ni Pangulong Duterte ang idineklara nitong unila­teral ceasefire sa mga rebeldeng komunista sa kanyang unang State of the Nation Address ­(SONA).

Inihayag naman ni Sison na hindi sila masisindak sa ginawang pagbawi ni Duterte sa unilateral ceasefire bagama’t plano­ na rin umano ng mga rebeldeng komunista na magdeklara na rin ng tigil-­putukan laban sa mga tropa ng pamahalaan.

Binawi ng Pangulo­ ang unilateral ceasefire matapos na tambangan at mapatay ng mga rebeldeng New People’s Army (NPA) ang isang grupo ng militiamen habang pabalik sa kanilang kampo sa Kapalong, Davao del Norte kung saan isa ang nasawi habang apat ang sugatan.

Ikinagalit ito ni Duterte na binigyan pa ng deadline ang mga rebeldeng komunista para­ magdeklara ng sarili nilang ceasefire.