Kayang-kaya ng ROS ang Magnolia — Nambatac

WALANG YABANG!

Si Rey Nambatac ang bumida sa fourth quarter nang pangunahan ang atake ng Rain or Shine tungo sa 91-81 panalo laban sa Magnolia sa Game 6 ng PBA Philippine Cup semifinals sa Ynares Center, Antipolo.

Naglista ng 13 points si Nambatac sa fourth quarter, 12 dito mula sa pinakawalan na apat na 3-pointers, tungo sa 16 points.

Napuwersa ng Elasto Painters ang deciding Game 7, pag-aagawan nila ng Hotshots ang huling tiket sa finals mamaya sa MOA Arena. Nakaabang na sa mananalo ang four-time champion San Miguel Beer na tinapos ang serye kontra Phoenix sa limang laro noong Huwebes.

“It’s do-or-die for us, at pinag-uusapan namin eto na ‘yung point na ayaw naming masayang ‘yng pinaghirapan namin,” anang third-year guard na produkto ng Letran. “Sabi namin, huwag naming puwersahin dahil kayang-kaya naman namin ang Magnolia.”

Sa umpisa ay hinayaan ni Painters coach Caloy Garcia ang kanyang ve­terans na sina James Yap, Beau Belga, Gabe Norwood at Jewel Ponferada na makipagsabayan sa Hotshots ni coach Chito Victolero.

Abante ang Rain or Shine 41-35 sa break pero naibuhol pa ng Magnolia 62-62 pagkatapos ng three. Sa final period, nagliyab si Nambatac.

“Lahat ng ipasok ni coach Caloy, nag-step up. Specially ‘yung mga beterano,” dagdag ng 5-foot-10 playmaker. “Sila actually ang talagang nag-lead sa amin, sumunod lang kami sa kanila.”

Tumapos din ng 16 points si Yap, 15 kay Belga at 11 kay Ponferada.

Sa unang pagkakataon, matitikman ng 25-anyos na si Nambatac ang Game 7. Hindi maiwasang kabahan.

“Game 7, do-or-die,” aniya. “Medyo may pressure, nakakakaba kasi nga professional league na ‘to.” (Vladi Eduarte)