Nagpasabog si MJ Dela Virgen ng 17 points para akayin ang JRU sa 82-74 panalo kontra Letran kahapon sa FilOil Flying V Preseason Premier Cup sa The Arena sa San Juan.
Sumahog ng five rebounds at two assists si Dela Virgen, bumakas sina Gio Lasquety at Teytey Teodoro ng 12 at 11 markers para sa Heavy Bombers na malinis sa tatlong laro.
Sinandalan ng Knights si Rey Nambatac nang habulin ang 11-point deficit sa final stretch pero kinapos pa rin ang mga taga-Intramuros.
Kumana si Nambatac ng five straight points kasama ang 3-pointer para tapyasin sa apat ang hinahabol 78-74 may 1:11 na lang sa orasan.
Sumagot agad si Lasquety ng baseline jumper at dalawang free throws ni Dela Virgen at naselyuhan ng Kalentong-based squad ang panalo.
Masaya dahil nanalo pero hindi nagustuhan ni JRU coach Vergel Meneses ang pag-relax ng kanyang mga bataan.
“Akala nila hindi na makakabalik ang Letran, eh never-say-die lagi mga ‘yan,” wika ni Meneses.
Nagkamada si Nambatac ng 25 points, six rebounds at tig-three assists at steals para sa Letran na bokya pa rin sa panalo sa tatlong laro.
May 11 points at seven rebounds si Jeo Ambohot sa Knights.