Hands off si Senate­ President Aquilino ­‘Koko’ Pimentel sa hirit ni Senador Leila De Lima na pa­yagan siyang lumahok sa mga deliberasyon at pagdinig ng Senado gayundin pagdating sa botohan.

Sa halip, paglilinaw ni Pimentel, ang korte lamang ang maaaring makapag­desisyon ukol dito.

“Nasa court na ‘yung issue, so let the court decide,” ayon kay Pimentel.

Ayon pa kay Pimentel, dapat ang mga abogado ni De Lima ang kumilos para dalhin ito sa korte.

Gayunpaman, paglilinaw ng senador, ang umiiral na regulasyon ng kapulungan ay kailangan ang personal na presensiya ng isang senador pagdating sa interpelasyon, debate at botohan.

Sa paghain lamang ng panukala o resolusyon­ ang hindi na kailangan pa ang personal na presensiya ng senador.

“Ang rules kasi namin, you must be present to be able to interpellate, to debate and to vote, but you need not be present to file resolutions, to file bills,” ayon kay Pimentel.

Una nang hinirit ni De Lima sa liderato ng Senado na payagan siyang makadalo sa mga pagdinig at deliberasyon ng Senado gayundin ang pagboto upang magampanan umano niya ang kanyang trabaho bilang halal na senador kahit nasa kulungan.