Palaisipan ang tunay na motibo sa isang re­solusyong isinusulong ngayon ng isang grupo ng mga konsehal sa Maynila na ang layon daw ay magsagawa ng imbestigasyon ukol sa paglaganap ng iligal na sugal at prostitus­yon sa lungsod.

Ito ay ang ‘A resolution seeking to conduct an investigation on the ‘proli­feration of illegal gambling operation (sic) and prostitution in the City of Manila.’

Nag-ugat ang panukala matapos maiulat sa mga pahayagan ang reklamo ng mga may-ari ng ilang establisimiyento sa lungsod ukol sa isang grupo ng mga konsehal na ‘umiikot’ upang manghingi ng P30,000 hanggang P60,000 kada buwan at bilang kapalit ay hindi umano sila gagam­balain o ipasasara ng ilang miyembro ng Konseho na binubuo ng apat na kasalukuyan at dalawang dating konsehal.

Basehan ng inihaing resolusyon ay ang Section 458 ng Local Go­vernment Code of 1991 na nagsasabing bilang isang ‘legislative body’ ng lungsod, ang konseho ay maaariing gumawa ng mga ordinansa na pipigil at magpapataw ng multa para sa prostitusyon, bawal na sugal, kasama na ang ‘drug addiction, maintenance of drug dens, drug pushing, printing distribution of exhibition of obscene or pornographic materials or publications and such other activities inimical to the welfare and morals of the inhabitants of the city.’

Ang nakakapagtaka sa kontrobersiyal na re­solusyong ito ay dahil mga sinasabing kakampi raw ni Mayor Joseph Estrada ang naghain ng resolusyon.

Ano ang ibig sabihin ng mga konsehal na ito, na inaamin nila sa pamamagitan ng resolusyon na laganap ang iligal na sugal at prostitusyon sa Maynila na pinamumunuan ni Estrada?

Hindi lamang iyan, dahil nakasaad din sa re­solusyon na ang mga probisyon nito ay alinsunod sa kampanya ng ‘national government’ laban sa iligal na sugal at iba pang uri ng libangan at upang pigilan ang imoralidad na su­misira umano sa kapaka­nan ng mga taga-lungsod.

Duda tuloy ng ilang City Hall insiders na tila iniimbitahan ng mga konsehal na nagharap ng re­solusyon ang pagpasok ng national government sa Maynila upang humawak ng problema sa prostitus­yon at iligal na sugal, na ayon mismo sa resolusyon ay laganap na sa Maynila.

Isa pang nagdulot ng kulay sa resolusyon ay ang nakabinbing kahi­lingan sa National Bureau of Investigation (NBI) na naglalayong paimbestigahan sa ahensya ang ‘extortion activities’ ng grupo ng kasalukuyan at dating konsehal na na­ngingikil sa mga establisimiyento sa Maynila.

Anuman ang tunay na motibo ng resolus­yong ito ng isang grupo ng mga Konsehal ay sila lang ang nakakaalam pero kung pagbabasehan ang mga pangyayari ay hindi na kailangan pa silang tanungin dahil basang-basa na sa kanilang ikinikilos na kaya nila ito ginawa ay dahil sa datung, pera, salapi.

Nakapanliliit na gawain ng mga halal na opisyal. Pero alam nating anumang bagay na may masamang ha­ngarin ay hindi nagtatagumpay. Bukod pa rito, nakatitiyak akong wasak kayo kay Mayor Erap sa pinaggagagawa ninyo!