Kahit may kabigatan ang dala, nakipagsabayan pa rin si top favorite Lakan sa largahan upang sikwatin ang titulo sa 2017 PHILRACOM “4th Leg Four-year-Old Local & Above Stakes Race” kahapon sa Metro Turf, Malvar-Tanauan, Batangas.
Sakay ang 57 kgs., lumundag sa unahan si Lakan paglabas ng aparato pero binuliglig agad ng matutuling sina Messi at Blue Berry.
Bahagyang ibinigay ni class B rider Dodong Villegas ang unahan kay Messi pero ulo lang ang pagitan.
“Tutal nasa balya naman ako kaya hinayaan ko na makuha ni Messi ang bandera pero pinaharipan ko siya kasi lamang ako sa puwesto,” ani Villegas.
Sa huling tatlong daang metro kinuha na ng winning horse ang unahan at si Blue Berry ang kanyang kaagaw pero hindi nagpatalo si Lakan.
Tinawid ni Lakan, pag-aari ni Mandaluyong mayor Benhur Abalos, ang meta sa tiyempong 1:37 sa 1,600-meter race para ibulsa ang P300,000.
Nagkasya si Messi sa second prize na P112,500, inuwi ng tumerserong Blue Berry ang P62,500.